烈日大戰排隊黨！

我只係一個普通市民，想去銀行換單張$20奧運紀念鈔票，就係咁簡單，不過就俾我撞正班排隊黨。佢地正確嚟講應該叫「排隊打占黨」，主要功能係排隊攞完籌之後打占再攞過籌。佢地今日响正我前面打占，打完一個又一個，我比較衰，係要同佢地力撐到底，到最後發現佢地原本係計劃要响我前面打占十幾個人！由於佢地打占技倆實在「出神入化」，所以想寫出嚟俾大家欣賞下，笑下，或者提防下。


先講少少換奧運鈔需要留意事項：

我噚日中午去左觀塘、藍田兩間，兩間都話派哂籌，最後一日係7月31日，派籌時間係9:00正至大約11:30左右。結果我今朝早8:45再去藍田排過，職員話每日只派1500張籌，我大約排到10:30先攞到籌，差唔多排左兩粒鐘，攞籌時需要出示身份証。我張籌規定1:30至2:00再嚟換鈔票，建議大家最好於規定時間後段去換，因為早一秒銀行都唔會俾你攞，仲要全部排哂响度再等，只俾上一個時段嘅人換。上一個時段嘅人只會剩好少，所以唔洗排。換之前會再核實你身份証係咪你本人，每人限換兩套，每套$138，兩套合共$276。


講返排隊打占黨，首先，點分辨佢地呢？可留意佢地特徵。

一般市民特徵：好沉默
排隊打占黨主要特徵：好多野講

「嘩！乜今日咁多人？平時好少人架喎！」
「咁多人未必可以排到第二輪囉？」
「好似話要檢查身份證架，咁即係唔可以排第二輪囉！」
「都唔明啲人炒嚟做乜？賺得幾多丫？」
「前面啲人排完隊又打占再排，都唔知輪唔輪得到我？」

我遇到果班係一般家庭主婦，佢地笑容親切，開頭完全唔似係有組織人士。佢地講野有時會自相矛盾，有時會賊喊捉賊，我估主要目的係想大家覺得佢地係良好市民。後嚟就嚟一班細路同阿婆，仲有一個比較大隻嘅男人負責指揮。班家庭主婦就不斷用电話聯絡，响成條隊度走前走後，四處建立據點，準備排完再打占。個大隻男人，初初我以為係黑底果類人，點知一開聲講野，就知原來只係普通鼠輩，類似專貪小便宜果種，冇乜殺傷力。


我嘅主要兩大武器：

未講佢地技倆之前，先介紹我嘅主要「武器」。基本上全個抗戰過程都需要見招拆招，但當中有兩招經常重覆使用，而且非常有效，簡直係我嘅主要武器。

「我已經俾你地加左兩個人 ...」
每次我講完呢句，佢地個勢會明顯弱左好多。 XD

「你地如果不斷咁加落去，咁我同後面排隊果啲人點算？」
通常我講完呢句之後，都會企開少少伸手示意後面有幾多人，後面果啲主要都係家庭主婦、阿公阿婆同細路，不過係良好市民唔係排隊打占黨，雖然佢地會比較怕事唔識點幫我，但每次我伸手示意後，佢地都會好合作，成百對眼睛一齊怒beer班排隊打占黨，果度氣勢，確實驚人！ XDDD


以下係佢地打占秘技大公開！


第一招，見面禮：

當日我幾經艱苦搵到條龍尾，一排隊班家庭主婦就開始佢地賊喊捉賊嘅對話。冇耐其中一個主婦微笑同我講：「我仲有一個人排緊架，不過佢行開左，轉頭會返嚟。」基本上呢招一定掂，因為開頭佢真係好似良好市民，同埋我冇乜理由拒絕佢。


搵第一個細路打占：

排排下，突然出現一個類似總指揮，就係我講果個大隻男。佢帶左個著黃色衫嘅細路嚟，然後搵張凳仔俾佢叫佢乖乖地坐定定。佢同個細路嘻嘻哈哈一輪後，就放低個細路同張凳自己走左去。我見大家都唔出聲，大家眼神又奇怪，就問個細路後面個主婦識唔識個細路，佢話唔識，再問細路前面個主婦，都話唔識。跟住佢地冇耐就齊聲話個細路係前面個家長嘅，佢地一路講，眼神一路四處游移。跟住我就冇再出聲喇，因為知道佢地全部幾個人都係一黨，未知點應付，暫由得佢地加第二人。


再搵第二個細路打占：

大隻男見咁順利，當然再搵第二個嚟打占，今次係個藍色衫細路。當時我以為大隻男係黑底類人士，唔係好敢惹佢，但見佢咁過份，就硬住頭皮開聲：「喂你唔好太過份喎。」諗住死就死啦！點知到佢一開聲，原來只係個鼠輩，我都唔記得佢講乜，只係繼續同佢理論：「我前後俾你地加兩個人，已經仁至義盡架喇，你地唔好太過份呀下。」但我feel到佢似乎想同我糾纏好耐，用時間去消耗我力氣，所以我一定要另諗辦法：「今日淨係得1500張籌，你地如果不斷咁加落去，咁我同後面果啲攞咩呀？」緊接住立即細細聲响佢耳邊講：「淨係放個黃衫細路好喇...唔好再加個藍衫細路...」我專登細細聲，其實係示意不如大家一人讓一步，大隻男亦好快get到我意思，或者話中左我圈套，願意唔再糾纏，帶走個藍衫細路。


我停會好瘀：

其實到呢度，我已經想收手唔係好想理，但如果突然又唔理，我會覺得自己好瘀，所以逼於無奈，一定要硬住頭皮，理到最後一刻。


望後面轉移視線：

寫到呢度啲時序可能有啲亂，或者我記得咩寫咩啦。沿途唔同據點，不斷有零星爭吵發生，班主婦就不斷望後面，佢地啲動作好誇張好假，似乎係想轉移視線。但呢招其實冇乜用，因為我緊係死都唔望後面啦，淨係望實佢地有冇新人再打占。


母子親情演出：

唔記得幾時，個藍衫細路又走返埋嚟，我當然再喝住佢，冇耐佢阿媽亦排完上一個據點，趕返嚟認仔。佢兩母子出現時間非常接近。「喂！呢個我個仔嚟架！你痴線架？你唔好碰我個仔呀！」我初初唔信佢地係兩母子，所以冇理佢：「我認得妳，妳一開頭有响度排，之後走開左。但呢個藍衫細路我未見過，唔可以企响度。」雖然佢目的係打占，但一樣可以借住個勢釋出自己嘅強烈母性，只見佢愈嚟愈激動，好似我就嚟要加害佢個仔咁保護個仔。我亦開始懷疑佢地真係兩母子，同埋想轉移視線控制住佢嘅真情緒同半演技，於是靜心咁問：「呢個係你個仔？」佢靜左落嚟：「係呀。」我露出疑惑神情再問：「佢真係你個仔？」佢好急咁答：「緊係啦！」然後我襯此大好時機，拉住黃衫細路：「咁黃色衫呢個係咪你個仔？」佢唔出聲，我再大聲啲重覆問，佢就答：「唔係。」我就即刻順住個勢：「咁就黃色衫呢個走啦。」然後示意叫個黃衫細路走。趕走左個黃衫細路之後，個阿媽竟然仲繼續失控好似哭緊咁講：「救命呀！佢蝦我個仔呀，佢痴線架！」仲要源源不絕講好多野，我就冷靜答：「你唔好咁激動住，你冷靜啲諗下先啦，我已經俾你地前後加左兩個人架喇，你地唔好太過份，一人讓一步啦好冇？」個阿媽聽完之後，即刻靜哂！然後眼神鼠嚟鼠去唔知諗緊乜。


細路發癲：

唔記得咩時候，個黃衫細路又企左埋嚟。同大家糾纏左一陣，個細路突然發癲好惡咁望住我講野，細路惡起上嚟有時仲惡過大人，佢個樣就惡到有少少似獅子。不過佢呢招冇乜用，因為我根本當佢唔存在，自己諗緊第二啲野，然後同班主婦繼續講。個細路見狀就好冇癮唔知點算好咁。


高手主婦出現：

之後又唔記得幾時，我同大家糾纏得好辛苦，突然出現一個主婦為我抱不平，講好多野，例如：「有冇搞錯呀，咁樣打占法。應該一個換一個丫嘛！」一路幫我講好說話，講講下個黃衫細路都走左，我以為告一段落。點知發現個抱不平主婦企左响度，原來又係同一黨！佢呢招真係高。我走上前拍佢：「但係妳本來都唔係排呢度架喎？妳走開啦，妳走開啦。」大隻男即刻响後面大叫：「你咁樣即係非禮佢！你知唔知佢可以叫非禮架？」其它人亦開始起哄：「咪囉！點可以咁樣推人架？唔好推啦。做乜推丫？」然後佢地論點愈嚟愈多樣化：「佢根本唔知自己响度做緊乜，我地成班只不過係朋友，幫朋友排隊有乜問題？」佢地愈講個勢愈優，聲勢愈浩大，我都感覺到自己個勢唔多掂，似乎逼於無奈一定要讓高手主婦留低。但臨尾都要出多次絕招，否則我會失勢：「我而家俾你地加第三個，我點知你地仲會唔會加第四、五、六...個架？」「你地如果再加落去，咁我同後面果啲人攞咩呢？仲有咩籌剩低呢？」講完佢地靜哂，我亦任由個高手主婦留低。


厲聲咆吼：

之後冇耐又糾纏，只記得我想講：「我已經俾你地三個人打占 ...」我都未講完，個大隻男就厲聲咆吼：「咩『打占』呀？我同你講！我地唔係『打占』！你唔好以為剩係你識惡呀！我都識惡架！」首先聲明，佢話我惡，其實我唔係。 XD
惡係冇用嘅，我唔係講緊爛調。每當惡到出嚟果陣，情緒去盡左，好易會倒轉頭洩氣失勢，我諗大家應該get到我指乜。 :P
如果將怒氣收藏响裏面，只表現理性，個勢就可以keep好耐一路keep到尾。當時果個大隻男真係好惡，佢係用盡喉嚨去吼叫，我估幾條街都聽到。正常情況我見到咁惡點都會有啲驚，但當時唔知點解一啲驚嘅感覺都冇，反而只有滿腦疑問嘅感覺，唔明點解我講「打占」二字佢可以嬲到吼聲上天？正當我疑惑緊果陣，佢見到我一啲驚都冇，我就feel到佢度氣洩得好快，好快轉身低頭同細路仔傾謁之類。我就笑住講：「哦，好囉，係『加三個人』，唔係『打占』囉，原來你唔鍾意『打占』二字。」


大隻男排隊：

時序真係唔記得。佢地次次加人都唔成功，大隻男就走埋嚟排隊，我當然有問佢做咩打占，佢就話佢唔係排隊，只係傾謁。我知如果我拖耐左，佢呢招就會成功，所以就叫佢如果傾謁企開少少，唔好企埋條隊度。佢就响度嘈：「咩呀？我地自己响度傾謁，你唔好理我地啦！」今次我真係喝唔住佢地。但因為排到呢度，已開始見到銀行保安人員，我就同大隻男講我去叫保安員嚟，然後我就離隊走上前去叫個保安過嚟。個保安似乎好有經驗，佢見到大隻男，離遠已經開始喝佢，仲要係鎖定目標淨係喝佢，完全唔洗我指係邊個。之後佢地當住面互相爭持左好耐，睇嚟大隻男都俾佢喝左唔少日子。


停哂响度唔行：

其中去到另一位保安前面，班主婦企哂响度唔行，我初初以為係因為有個保安响度。後來諗諗下可能中左計，於是就問：「你地做咩唔行呀？」自己就行左上前先。然後佢地响後面趕嚟，喝住前面兩個好生面孔嘅阿婆齊聲叫道：「阿婆妳地做咩打占呀？」之類，起哄完一輪之後，只見兩位阿婆低低頭行開，然後大隻男再示意兩個阿婆去另一個方向。其實，我根本留意唔到條隊多左兩個阿婆，係佢地自己太敏感，自己踢爆返自己，然後我先知，佢地停哂响度就係為左掩護阿婆打占。


其它唔太記得：

其實中途仲有好多新面孔，不過我記唔哂寫唔哂，前前後後成隊人大約有十幾人左右。整個排隊過程真係辛苦到爆！唔單止係因為佢地車輪戰咁轟我，更加係因為天氣又熱又焗，我一心只係想快啲攞完紀念鈔，返屋企沖番個靚涼。 :P


～後話～

各位网友，你地如果想襯最後兩日去攞紀念鈔，最好早啲去排隊，否則1500張籌好易俾啲排隊打占黨車輪式攞哂。如果想對抗排隊黨，最好兩個人一齊去，否則一條友冇人幫口真係好吃力。